Wedharan Lamaran

Assalamu’alaikum warrahmatullahi wabarakatuh.

Kamulyan, kabagyan, miwah karaharjan mugi tansah tumanduk dumatheng kula panjenengan sedaya ingkang sampun kepareng rawuh wonten ing ngriki. Para pinisepuh, sesepuh ingkang minulya. Sagung para rawuh ingkang kinurmatan. Mirungganipun Bapa lan Ibu Sarjono ingkang ambeg berbudi darma.

Puji syukur konjuk dhumateng ngarsanipun Gusti ingkang murbeng dumadi ingkang sampun paring pinten-pinten kanikmatan dhumateng kula panjenengan sekaliyan. Antawisipun nikmat karahayon sowan kula sabrayat saking Kebumen dumugi ing Solo ngriki boten wonten pambengan satunggal menapa.

Bapa lan Ibu ingkang minulyeng ing budi, kula Anna minangka bahaling kandha saking Rakamas Budi Raharjo sekaliyan, kepareng matur :

Sepisan

Rakamas Budi Raharjo sekaliyan ngaturaken sungkem pangabekti dhumateng para pepundhen, sesepuh, miwah kasepuhan ing ngriki. Ugi salam taklim dhumateng Bapa Sarjono sekaliyan.

Kaping kalih

Menggah wigatosipun kula sabrayat sowan menika, namung dipunsuwun dening Rakamas Budi Raharjo supados nyuwun pirsa menapa leres panjenengan kagungan putri ingkang sesilih Nimas Sekar Pandanwangi? Lan menapa leres taksih ijen lan dereng gadhah pancangan?

Mbok bilih leres, Rakamas Budi Raharjo badhe ngebun-ebun enjang anjejawah sonten, kang putrid badhe kadhaupaken kaliyan anak kula lanang Dimas Bagus Kuncoro Winarno ingkang sakmenika uga tumut wonten ngarsa panjenengan.

Ambok bilih panglamar menika katampi, Rakamas Budi Raharjo sekaliyan ugi ngaturaken sesupe (ali-ali) minangka tangsulipun rembag saha ubarampe sawetawis minangka tandha sih katresnan Rakamas Budi Raharjo sekaliyan katur dhumateng Bapa Sarjono sekaliyan. Kanthi menika, mugi katampia kanthi renaning penggalih.

Wasana, kula minangka talanging basa Rakamas Budi Raharjo sekaliyan wonten atur ingkang kirang mranani ing penggalih, kula nyuwun agunging sih samudra pangaksami. Nuwun.

Wassalamu’alaikum warrahmatullahi wabarakatuh.